Skólinn að byrja...

Hæ hæ

Það er búið að vera alveg "brjálað" að gera hjá mér í dag. Ég er búin að vera að passa tvö yngstu systkinabörnin mín og þau sváfu bara allan tímann .

Annars er bara skólaundirbúningur í fullum gangi. Ég fékk góða stundartöflu, tek 20 einingar þessa önn.

Ég hef annars voða litið að skrifa um, vildi bara vera á undan Hrönn að blogga .

Kv. Gróa Rán

 

Sumarið að klárast

jæja ætli maður skelli ekki inn fyrsta blogginu á þessari síðu  
Ég er nýkomin heim úr vinnunni...var illa tekin í vatnstríði en er núna komin í þurr föt, er samt smá kalt.  Svo á morgun er fyrsti dagurinn minn á Borgarspítalanum og síðan byrja ég bara í skólanum á miðvikudaginn. Fékk góða stundatöflu og hlakka bara verulega til að byrja aftur.

 Hef svo sem ekkert meira að segja í bili

 Viktoría

Frábær íþrótta- og menningardagur í gær !

Alveg frábærlega skemmtilegur dagur í gær.

Hittumst þrjár elstu með börnin og brunuðum í vesturbæinn til að taka þátt í Latarbæjarmaraþoni, horfðum á fullt af skemmtiatriðum og sóluðum okkur fyrir framan Háskólann í frábæru sumarveðri. Að loknu hlaupi og skemmtiatriðum var maginn farin að segja til sín og stefnan tekinn á Skriðustekkinn þar sem pallurinn var hertekinn og skellt á grillið. Því næst flyktumst við niður á Miklatún ásamt Skildi Orra og Gunnu Viktoríu til að hlýða á tónleikana og ekki fannst yngra fólkinu verra að það voru leiktæki á staðnum.

Skellti inn myndum, endilega skoðið til að sjá stemminguna.

 Takk fyrir meiriháttar dag.

Kveðja Dröfn

Stenst aldrei áskorun

Maður getur nú ekki verið minni maður svo ég ákvað að skella inn bloggi. 

Við Viktor vorum að horfa á afmælistónleika Kaupthings í sjónvarpinu og ég get nú ekki sagt annað en að hann Helgi Björns hafi verið aðeins unglegri og meiri töffari í Njálsbúð forðum (ja allavegna unglegri), Viktori fannst hann vera gamall kall. Honum fannst Páll Óskar aftur á móti flottur í hvítu jakkafötunum og var alveg viss um að það væru margar stelpur skotnar í honum (hehehe).

Setti inn nokkrar myndir frá útilegunni okkar um síðustu helgi

 

 Kveðja Dröfn

 

Þerney

Sælt veri fólkið.
Ég vil bara þakka fyrir góðan dag í gær. Dagurinn í dag var aðeins æsilegri. Fór með hópi starfsmanna út í Þerney að koma restinni af rollum og geitum í "sumarfrí". Þetta byrjaði á því að veðrið var hundleiðinlegt og vont í sjóinn svo að við þurftum að fara út í Álfsnes þar sem við gátum siglt beint yfir í eyjuna. Þegar við komum útá nesið hafði bensínslangan af bátnum gleymst í garðinum svo að við rerum fyrstu ferðina út í eyna á meðan 1 brunaði aftur í bæinn að sækja slönguna. Í Þerney fórum við 4 í land og byrjuðum að smala á meðan 2 fóru aftur til baka með bátinn til þess að bíða eftir slöngunni. Eftir langa göngu fundum við geiturnar í hinum enda eyjunnar og stuttu seinna fundust kindurnar. Ég rölti með geiturnar og við komum þeim í réttina nánast klakklaust. Kindurnar voru ekki eins auðveldar og þurfti að elta þær tvisvar um alla eyna. Á meðan á hinum bakkanum kom hann með vitlausa bensínslöngu og þurfti að fara aðra ferð að sækja réttu slönguna. Á endanum komst báturinn þó yfir og rollurnar í réttina. Þá var borðað nesti í glampalogni og sól og eftir það dröslast með féð í hestakerru og restinni hleypt í "sumarfrí". Þetta var mjög hressandi ferð og góð tilbreyting en ég held að það sé best að halda sig bara við að reka kýr! Á morgun er seinasti dagurinn minn sem húsvörður og mér verður líklega hent í tjörnina í lok dags. Ég ætla að reyna að setja inn eitthvað af gömlum myndum.

Halla